Cassiodorus, Institutiones, 1, CAPUT XIII. Divisio Scripturae divinae secundum Augustinum.
| 1 | Scriptura divina secundum beatum Augustinum in Testamenta duo ita dividitur, id est in Vetus et Novum. In historia sunt libri viginti duo, id est, Moysi libri quinque, Iesu Nave liber unus, Iudicum liber unus, Ruth liber unus, Regum libri quatuor, Paralipomenon libri duo, Iob liber unus, Tobiae liber unus, Esther liber unus, Iudith liber unus, Esdrae libri duo, Machabaeorum libri duo. |
| 2 | In Prophetis libri viginti duo, David Psalmorum [ms. Aud., Psalterium] liber unus, Salomonis libri quatuor, Iesu filii Sirach liber unus. Prophetae maiores quatuor, id est, Isaias, Ieremias, Ezechiel, Daniel; et minores duodecim, id est, Osee, Ioel, Amos, Abdias, Ionas, Michaeas, Nahum, Habacuc, Sophonias, Zacharias, Aggaeus, Malachias. |
| 3 | In Epistolis apostolorum viginti una, id est, Pauli apostoli ad Romanos una, ad Corinthios duae, ad Galatas una, ad Ephesios una, ad Philippenses una, ad Thessalonicenses duae, ad Colossenses una, ad Timotheum duae, ad Titum una, ad Philemonem una, ad Hebraeos una; Petri duae, Ioannis tres, Iudae una, Iacobi una. |
| 4 | In Evangeliis quatuor, id est, secundum Matthaeum, secundum Marcum, secundum Lucam, secundum Ioannem. In Actibus apostolorum liber unus. In Apocalypsi liber unus. Beatus igitur Augustinus secundum praefatos novem codices, quos sancta meditatur Ecclesia, secundo libro (Cap. 8) de Doctrina Christiana, Scripturas divinas septuaginta unius librorum calculo comprehendit: quibus [ed., cui] cum sanctae Trinitatis addideris unitatem, fit totius libri competens et gloriosa perfectio. |